309. ගිනිගත් හිම...

සිසිල් සුදු හිමෙන් වැසි

සුළඟට රඟන තුරු හිසක් පාමුල

ඇවිලි ගිනි පුළිඟුවෙකි

තියුණු රුදු ගිනිදළු විහිදුවන...

හිම දියැව තුරු ගොමුව තෙත් කර

ගලා හැලුණි - සැඟැවුණි - ගිනි රැසින් වියැලුණි

අවසන එතුරු වදුලද

ගොළුව මිලිනව වියැලුණි

මියැදුණි... 

307. ගී සරින්... ඒ ගී සරින්.....

මේඝ වළා සරනා දුර අහසේ

අසනි විසිරි ගිගිරුම් අතරේ

මතක මංපෙතේ මං සලකුණු මැද

මංමුලා ව සැරිසරන වෙලේ

ඒ ගී සරින් - මන්මද නදින්

ඝනඳුරු බිඳී හිරු රැස් දිලී...

මල් මුවරදින් - රොන්සුණු අරන්

පියමං කළේ දෙව්ලියක සේ...

නූපුර රැව් දෙන මල් වැහි පොද මැද

කිකිණි සිනා කැන් විසිරෙන්නේ

ඒ මන්මද නද මුසුව බිඟුන් සර

වන තුරුලිය මල් පුබුදන්නේ

සිහිලැල් හිරිකඩ මුසු පවනැල්ලේ

පා වී එන්නේ ඒ මල් සුවඳයි...

ඒ ගී සරින් - මන්මද නදින්

ඝනඳුරු බිඳී හිරු රැස් දිලී...

මල් මුවරදින් - රොන්සුණු අරන්

පියමං කළේ දෙව්ලියක සේ...

ගී සරින්... ඒ ගී සරින්.....

300. ඒ දිගු සුසුම් රැල්ලට පෙර...

ජීවිතයක මතක පොදි බැඳ

එක් දිගු සුසුම් රැල්ලක මුසු කොට

ගුවන් තලයට මුදාලන දිනෙක

ඒ සුසුම සිහිල් මඳ පවනක්ව

ඒ මතක සුසුදු මල් සුවඳක්ව

හමනු ඇත...

ඒ දිගු සුසුම් රැල්ලට පෙර

ලොවට නොරිදා

මතක ගොඩනැගූවන් වෙනුවෙන්.....

ලොවම සනසා

ආදරය බෙදූවන් වෙනුවෙන්.....

299. වෛර(ස)ය...

ලැප්ටොප් පරිගණකයේ යතුරු පුවරුව මතින් බොහෝ වේලාවක් පුරා වේගයෙන් සැරිසැරූ කාර්ල්ගේ දෑත් මඳ ඉසිඹුවක් ලබාගත්තේය. ඔහු කට කොණකට නැගුණු සිනහවකින් - නැත එය වියරු විරිත්තීමකි, වසරකට එපිටදී ඔහුගේ ලෝකය ම සුනුවිසුණු වී ගොස් ඝන අන්ධකාරයකින් වැසී ගිය පසු තමා සිනාසුණු දිනයක් ඔහුට මතක නැත - විරිත්තීමකින් යුතුව අසුනේ පසුපසට බර වී දෑත් හිස මත බැඳගත්තේය. තවත් හෝරා කිහිපයක ඇවෑමෙන් මෙය අවසන් වනු ඇත. ඔහුගේ මාස ගණනක මහන්සියේ ප්‍රතිඵලය සයිබර් අවකාශයට මුදාහැරෙනු ඇත.

කාර්ල් ස්වාධීන මෘදුකාංග ඉංජිනේරුවෙකි. ක්ෂේත්‍රයේ ජනප්‍රියව ඇති අන්දමට 'ෆ්‍රීලාන්සර්' කෙනෙකි. ඒ ලෝකයා හමුවේ ඔහුගේ ප්‍රතිරූපය විය. නමුත්, ලෝකයාට විවර නොකෙරුණු ඔහුගේ රහස් ජීවිතය තුළ ඔහු සයිබර් අවකාශය තුළ අදිසි විවරයන් සොයා යන සොර දෙටුවෙකු විය. එනමුදු මෙතෙක් කලක් ඔහුට එය හුදු විනෝදාංශයක් පමණක් විය. කිසිදු විනාශකාරී කටයුත්තක් උදෙසා මෙතෙක් තම ප්‍රාගුණ්‍යය මෙහෙයවා නොතිබූ කාර්ල් වරෙක තම හැකියාවෙන් රාජ්‍ය බුද්ධි අංශයටද සහය වී ඇත. නමුත් එම අවකාශයේ ඇති අතිශය සීමා සහිත බව හේතුවෙන් ඔහු එක් ව්‍යාපෘතියකින් ම එම භාරදූර වෘත්තියට සමු දී සිය සුපුරුදු සැහැල්ලු ස්වාධීන ජීවිතයට පිළිපන්නේය.

ඔහු නීතිරීතිවලට යටත්වන්නට, රාමුවක් තුළ කොටුවන්නට පුරුදු වූවෙකු නොවී ය. බාල වියේ පටන් ඔහු ජීවත් වූයේ ස්වාධීන ව ය, නිදහස් ව ය. හරිත මිටියාවතක් හරහා සුළඟට එරෙහි ව දිව යන වල් වැදුණු අශ්වයෙකු සේ අයාළේ - එසේම නිදහසේ - සැහැල්ලුවෙන් ජීවිතය ගෙවමින් සිටි කාර්ල්ගේ ජීවිතය එක් දිනෙක, නොසිතූ මොහොතක එක් සොඳුරු බන්ධනයක පැටලින. වීණා එම හැල්මේ දිව ගිය තුරඟාගේ හිස මත හිඳ ගී වයන්නට පටන්ගත්තාය. සිය නිමක් නැති ධාවනය මඳකට නතර කළ කාර්ල් එම වැයුම අසා හිඳින්නට පුරුදු වූවේය. ඇගේ බසින් ඇගේ නමේ අරුත ඈ කියා දුන් ලෙසින් ම ඇය වීණාවක් වූවාය. එතෙක් කිසිදු බන්ධනයකට යටත් නොවූ කාර්ල්ගේ ජීවිතය ඇගේ වීණාවේ සප්ත ස්වර අතර සදාතනිකව ම බැඳී ගියේය. 

එතැන් පටන් ඔහුගේ මුළු ලොව ම බවට පත් වූයේ වීණායි. බාල වියේදී ම මව්පියන් සමග ශ්‍රී ලංකාවේ සිට එංගලන්තයේ පදිංචියට පැමිණ සිටි ඇය පවුලේ එක ම දරුවා වූවාය. එක ම සරසවියේ පරිගණක අංශයේ සහ කලා අංශයේ විද්‍යාර්ථීන් දෙදෙනෙකු වූ ඔවුන් හට ඇගේ මවුපියන්ගෙන් විරෝධයක් එල්ල නොවීය. ඔහුගේ පාර්ශවයෙන් විරෝධය පාන්නට හෝ කැමැත්ත ලබා දෙන්නට හෝ කිසිවෙකුත් නොවීය. කාර්ල් සහ වීණා විවාහ වූහ. සොඳුරු යුග දිවියක් ගෙවූහ. කාර්ල් ඈ හා ගෙවෙනා එම දිවියෙන් පරිපූර්ණ තෘප්තියක් අත්වින්දේය. නමුත් ඈ හට එය ප්‍රමාණවත් නොවිණි. ඇයට තුන්වැන්නෙකු උවමනා විය. එහි ප්‍රතිඵලයක් ලෙස අවසන ඔහුට ඈ අහිමි විය. කාර්ල් හුදෙකලාව, අසරණව දින ගණනක් පුරා හඬා වැළපුනේය. එම දීර්ඝ වැළපුමෙන් ඉක්බිති ඔහු ඈගේ මතක සටහන් සියල්ලෙන් ඈත් වී පලා ගියේය. නුහුරු නුපුරුදු අඳුරු නගරයක, පාළු නවාතැනක හුදෙකලා වී ලෝකයට වෛරය පතුරුවන්නට සිතාගත්තේය.

එතෙක් කල් ඔහුගේ සිත පෙලූ වෛරය, පරිගණක වෛරසයක්ව සයිබර් අවකාශයට එක් වන්නට සූදානම් ය. ඔහු තමා නිමැවූ පිසාචයාගේ හැඩ බැලුවේය; තව තවත් බිහිසුණු බව එයට එක් කළේය. අවසන යළිත් වරක් තෘප්තිමත් සිතින් සිය නිර්මාණය දෙස බලාගෙන විරිත්තුවේය. අනතුරුව අවසන් බොත්තම ඔබා සිය පිසාචයා මුදා හැර දිගු සුසුමක් හෙලා ළය සැහැල්ලු කරගත්තේය.

ඔහු සෑදූ පිසාචයා ගම් දනව් සිසාරා පියාඹා ගොස් තුන්වැන්නන් සොය සොයා බිය වැද්දුවේය; ගිල දැම්මේය. දත් විලිස්සමින්, ගොරවමින් ඔවුන් පසුපස හඹා ගියේය. පිසාචයාට බිය වූ තුන්වැන්නන් යටි ගිරියෙන් හඬා වැළපෙන අන්දම දැක පිසාචයාගේ මුවගේ හුරු පුරුදු වියරු විරිත්තීමක් ඇඳී ගියේය. හැඩපළු ගෙතුණු රැවුලින් හා හිසකෙසින් යුතු තමාගේ වර්තමාන පෙනුමද පිසාචයාගේ රුදුරු පෙනුමට බොහෝ සෙයින් සමාන වූ බව කාර්ල් ඒ අතරේ සිතුවේය. පිසාචයා තවත් ගොදුරක් වෙත හැරුණි. මේසයක් මත සිනහවෙමින් හිඳ සිටි තුන්වැන්නා වෙත වූයේ බෙහෙවින් හුරු පුරුදු පෙනුමකි. පිසාචයා ඔහු වෙත ළ‍ං විය. අඳුරු දුමාරයක් පැතිරෙන්නට විය. හැඩි දැඩි අතක් දුමාරය මැදින් තුන්වැන්නා වෙත ඇදී ආවේය. වීණාගේ වේදනාබර විළාපයත් සමගින් කාර්ල් හති දමමින් අවදි විය.

ඔහු සිටියේ පරිගණකය ඉදිරියේ අසුන මතය. කුසගින්නේ අරගල කරනා උදරය සුපුරුදු කෙඳිරිය අරඹා ඇත. නින්ද නොයෑමෙන් පෙළෙනා තමා වෙත ඉඳහිට අවේලාවේ ළඟාවන කුකුළු නින්ද යළිත් වරක් තමා වෙත පැමිණෙන්නට ඇති බව කාර්ල් වටහාගත්තේය. නමුත් පුදුමයනම්, මතක ඇති කාලයකින් සිහිනයක් දැක නැති ඔහුට කිසිදා අමතක නොවන අන්දමේ සිහිනයක් පෙනීමයි. ඔහු තවමත් හති දමමිනි. අසළ මේසය මත වූ වතුර බෝතලය ගෙන එක හුස්මට බී අවසන් කළ කාර්ල් සිය මුහුණ දෑතේ හොවාගත්තේය. මොහොතක් එලෙස සිටි ඔහු දෑතේ ඇඟිලි අතරින් සිය පිසාච වෛරසයේ නිමැවුම් කේතය දෙස බැලුවේය. එය තවමත් එලෙසමය. තවමත් සයිබර් අවකාශයට එකතු වී නොමැත. ඒ මොහොතේ ඔහුගේ මුවින් පිට වූ වෙහෙසකර සුසුම තුළ යම් සැනසුමක් ද ගැබ්ව නොතිබිණියැයි ඔහුට කිව නොහැක.

කාර්ල් අසුනින් නැගිට සිටියේය. මාස ගණනාවකට පසු පළමුවරට ඔහුගේ අඳුරු නවාතැනින් පිටත පිරිසිදු වාතාශ්‍රයට පා තැබුවේය. ඔහුට වීණා මුළින් ම හමු වූ නගරය බලා පිටව ගිය කාර්ල් එතැන් පටන් ඔවුන් දෙදෙනා එක්ව මිහිරි මතක බෙදාගත් සෑම තැනකම ඇවිද ගියේය. 

පුරා සතියකට පසු ඔහු නැවත සිය නවාතැන වෙත පැමිණියේය. යළි පරිගණකය ඉදිරියේ හිඳගත් ඔහු එහි තමා නිමවමින් සිටි වෛරසයේ කේත සටහන් සියල්ල මුළ සිට අගට පිරික්සමින් වෙනස්කම් කළේය. පිසාචයා වෙනුවට වෛරසයට ආදරණීය මුහුණුවරක් ලබා දුන්නේය. ඒ වෙනුවෙන් ඔහු යොදාගත්තේ ඔහු සතුව තිබූ වීණාගේ ආදරණීය ම ඡායාරූපයයි. 

තවත් මසක ඇවෑමෙන් එය නිම විය. සයිබරය පුරා සැරිසරමින් ළමා වීඩියෝපට තුළට රිංගා ඒ අතරමැදින් තිරය පුරා පැතිරී ළමුන් බිය වද්දන්නට තැනූ තම වෛරී සහගත වෛරස පිසාචයා පළවා හැරි කාර්ල් ඒ වෙනුවට වීණාට, ඇගේ ආදරයට, යළි පණ දුන්නේය. තමා වෙනුවෙන් පමණක් වෙන්ව තිබූ ඇගේ ආදරය ලෝකයට මුදා හැරියේය. 

ඔහුගේ දත්ත ගබඩා අතර තිබූ ඇගේ ළයාන්විත නැළවිලි ගී ස්වරය මුසු කොට, ඩිජිටල් තිරය හරහා ඒ ඉදිරියේ බොහෝ වේලා රැඳී ඉන්නන් හට සිය ආදරණීයතමයන් සිහිපත් කරවමින් ඔවුන් වෙනුවෙන් කාලය වෙන් කළ යුතු බවට ඔවදන් ලබා දෙන ආදරණීය වෛරසයක් ඔහු අතින් බිහි විය. 

එය එලෙසින් නිමා කොට ඔහු දිගු ගමනකට සූදානම් වූවේය. ඒ වනවිට යළි ශ්‍රී ලංකාව බලා පිටව ගොස් සිටි වීණාගේ මව්පියන් භාරයේ වූ, කිසිදු වග විභාගයකින් තොරව තමා ඔවුනට ම භාරකාරීත්වය ලබා දුන්, ඇගේ සෙනෙහස තමාගෙන් උදුරාගෙන අහිමි කළ තුන්වැන්නා - මෙතෙක් ඇහැටවත් දැක නොතිබූ ඔවුන්ගේ ආදරයේ සංකේතය - බලන්නට යන්නට කාර්ල් අවසානයේදී හිත හදාගෙන සිටියේය. 

ශ්‍රී ලංකාවේ කටුනායක ගුවන් තොටුපොළ වෙත ඔහු රැගත් ගුවන් යානය ළඟා වන මොහොතේ, වසරකට අධික කාලයකට පසු කාර්ල්ගේ මුවග වියරු විරිත්තීමක් වෙනුවට, සැහැල්ලු මන්දස්මිතියක් රැඳී තිබුණි. ඔහුගේ හදවතේ වීණා වෙනුවෙන් වූ අමරණීය ආදරයත්, ආගන්තුක තුන්වැන්නා වෙනුවෙන් ලබා දෙන්නට නියමිත වූ පීතෲ ස්නේහයත් සුරැකිව රැඳී තිබුණි. 

ඔහු ලෝකයට මුදා හළ ආදරණීය වෛරසය ඩිජිටල් තිරය මත මව් ස්නේහයද, ආදරයද පතුරවමින් සැරිසරමින් තිබුණි.

*****

Facebook සමූහයක කෙටිකතා තරගයක් උදෙසා ලබා දී ඇති පින්තූරයට ලියූ කතාන්දරයකි. පෙර සටහනේ පළ කළ 'වියපත් නොවූ ප්‍රේමය' එම තරගයේ පළමු වටයට මා ඉදිරිපත් කළ කතාවයි. අවසාන වටයට පළ කළ කතාන්දරය ඉතා සුළු වෙනස්කම් කිහිපයකින් අනතුරුව මෙලෙස පළ කරමි. :)

296. තෙලිතුඩෙන් ලියැවුණු කවිය සහ පන්හිඳෙන් ඇඳි සිතුවම...

මගේ සිත්තරා ඇඳි සිත්තමකි :)

සිලි සිලි නදින් කොඳුරමින් නැලැවෙන

තුරු හිස් පිස හමා එන මඳ පවනැල්ල

හරිත පැහැ මුසු සිහිල් ගොම්මනේ

හෙමි හෙමින් ඇද හැලෙන මල් වැස්ස

සියොත් ගී රාවයෙන් කුල්මත්ව හිනැහෙන

කැලෑ මල් සුවඳින් පිරී ගිය වන ලැහැබ

ගලින් ගලට ඇද හැලෙමින් මුමුණමින්

පෙණ සිනහා නගමින් ගලා බසිනා සීත දිය දහර

වැහි බිඳු රැඳුනු සියපත් සුපිපුණු 

විල් තෙර අද්දර විසල් තුරු සෙවණෙක

ළන්තෑරුම් එළියක උණුහුම ගැල්වුණු

ගෙපැලක පිළ මත හිඳ

මේ සොඳුරු වසන්ත සිහිනය

සිතුවමට නගනා සිත්තරා කවුරුන්ද...

295. බලාපොරොත්තුවේ හඬ...

'ලබ් ඩබ් - ලබ් ඩබ්'
'ඔහෑ - ඔහෑ - ඔහෑ'
'ගුඩුස්'
'හිහිහි හෙහහ්'

'අම්මම්-මම් මම්'
'අම්මා'
'ලන්වන් පාතයි තමනලයා'
'මම අම්මාට ගොඩාක් ආදරෙයි'

'අම්මේ අද ටීච මට ගුඩ් බෝයි කිව්වා'
'හැපි බර්ත්ඩේ අම්මේ'
'අම්මා කෑවද?'
'මාත් අම්මාට උදව් වෙන්නං?'

'අම්මේ මං ආවා'
'අම්මේ බඩගිනියි'
'අම්මේ අද ෆීස්?'
'අම්මේ මං යනවා'

'හෙලෝ... අම්මේ...'

ඒ සියල් බලාපොරොත්තු මතින්
වැයේ තවමත් ඇගේ හද
'ලබ් ඩබ් - ලබ් ඩබ්'
නැත
'මගේ පුතු - මගේ පුතු'
රාවයෙන්.........

282. Roots and Wings...

"THERE ARE TWO GIFTS WE SHOULD GIVE OUR CHILDREN: ONE IS ROOTS. AND THE OTHER  IS WINGS."

ඇතිනම් මා වෙත වරයක්

පතන්නට පැතුමන් ද්විත්වයක්

පතමි සුරැකිව බදා වැළඳ හිඳුමට - මූලයක්

විදා හැර නිදහස සොයා යන්නට - පියාපත් යුවළක්

ඇතුළාන්තය පෝෂණය කරනා වටිනාකමින් හරබර - මූලයක්

ගමනාන්තය සොයා නිදහසේ පියාසරන්නට - පියාපත් යුවළක්.

සදාතනිකව තුරුළුව හිඳුමට

මා සුරකින්නට, දිරිමත් කරනට

මා අතින් වරදක් සිදු වූ විටෙක

ඔබේ ආදරය මා තනි නොකරනා බවට,

යා යුතු මග මේ යැයි හඳුනාගන්නට,

අයහපතින් අයපත වෙන් කර දැකගන්නට,

සැමදා ඒ උතුම් අභිමතාර්ථයේ ගැලී හිඳිනට,

ජීවිතයෙන් පරදින්නට නොව දිනන්නට,

ඇවැසිය මට - මූලයක්.

මා හට ඔබ උවමනා වූ විටෙක

හිඳිනු මැන මා අසළම

සනසනු මැනැවි මා හද

සියල්ල හොඳින් විසඳෙනු ඇති බවට

පියාසරන්නට පියාපත් විහිදනා කළ

ඇද වැටෙන විට සුවපත් කරලනු මැන මාගේ බියපත් සිත

මල් පෙති මතින් ගොඩ නගන්නට අවැසි නැත මා දිවිය

උත්සාහ කරන්නට ඉඩ දෙන්න මා හට

වැටි වැටී නැගිටින්නට උගන්වනු මැනැවි මා හට

පියාසරන්නට උගන්වනු මැනැවි මා හට.

ඇතිනම් මා වෙත වරයක්

පතන්නට පැතුමන් ද්විත්වයක් - ද්විත්වයක් පමණක්

එම වරය මා වෙත ලබා දිය හැක්කේ

මව්නි පියාණෙනි - ඔබට ම ය

ඇවැසි නැත මුදල් මා හට

සොබමන් විසිතුරු දෑද නොපතමි කිසි විට

මා ඉල්ලා සිටිනා උතුම් දායාද වන්නේ

මෙපමණකි, ඒ 'මුල් සහ පියාපත්' ය.

~ Translation of 'Roots and Wings' by Denis Waitley

281. අකුරු...

රුදු විස පිරි කටු අකුලේ සුවඳැති මල් පුබුදුවන්න

ගිනියම් වූ අඟුරු මතට වැහි පොද වී ඇද හැලෙන්න

හඳ නැති රෑ කළුවර මැද තරු එළියක් වී දිලෙන්න

අකුරුවලට ඇහැකිය ඒ අරුමැසි විසිතුරු මවන්න

චණ්ඩව මහ රළ නගනා සමුදුර මැද රුවල් ලන්න

ගිගුරුම් දෙන අසනි සරට මල්මද මුදු සිනහ දෙන්න

දුම් දමනා ගිනි කන්දක ලෝදිය කඳ නිවාලන්න

අකුරුවලට ඇහැකිය ඒ අරුමැසි මායම් මවන්න

279. සුබ උදෑසනක් වේවා... ඔබට සුබ උදෑසනක් වේවා.....

උදෑසන තේමා කරගත් සොඳුරු ගීත කිහිපයක්... අහන්න... රසවිඳින්න... කැමතිනම් ඔයාලත් කැමති ඕනෙම තේමාවකින් මේ වගේ ගීත එකතුවක් අපිත් එක්ක බෙදාගන්න.....  :)

1. මම ඉස් ඉස්සල්ලාම ඉගෙනගත්ත ගීතය. නන්දා මාලිනියන්ගේ හඳහාමී ගීත එකතුවේ ආනන්ද රාජකරුණා කිවිඳුන් රචනා කළ උදය නැමැති ගීතය.

සිලි සිලී හඬ ඇසේ - කොළ අතූ සෙළවිලා

සිටි සිටී හඬ ඇසේ - පිණි වැටී ඉහිරිලා

කපුටු කා කා ඇසේ - ඉර නැගී එළි වෙලා

අ යනු ආ යනු ඇසේ - පොඩි ළමෝ ඇහැරලා

මේ වීඩියෝ සබැඳියේ මුළින්ම තියෙන්නේ ඒ ගීතය. ඉන් එහාට තියෙන ඒ ගීත එකතුවේ අනිත් ගීතත් රසවින්දාට කිසිම පාඩුවක් නැහැ. :)

2. උදෑසන ගැනම නෙමෙයි වුණත්, උදේ පාන්දර අහන්න, දවසම වාසනාවන්ත කරගන්න මහා ආශිර්වාදයක් බඳු වුණ ගීතයක්. 

බුද්ධානුභාවේන සිත් නෙත් පහන් වී

මෙත් මල් පිපීලා මුදිතා ජලාසේ

නංවා ප්‍රභා ලොව්තුරා රශ්මි මාලා

හෙළ දෙරණ ජන ජයතු ජය මංගලානී

හෙළ දෙරණ ජන ජයතු ජය මංගලානී //

තණ්හා උපාදාන පරිදේව වියැකී

අඥාන අඳුරේ දැල්වී ප්‍රදීපේ

හඬවා නුවන් දැල් මංගල්‍ය ප්‍රීතී

හෙළ දෙරණ ජන ජයතු ජය මංගලානී

හෙළ දෙරණ ජන ජයතු ජය මංගලානී

බුද්ධානුභාවේන සිත් නෙත් පහන් වී...

භෘංගාවලී රාව ප්‍රතිරාව නංවා

බන්දා ප්‍රශංසා ජය කේතු කේලී

දසතින් ගලා ක්ෂීර පායාස ධාරා

හෙළ දෙරණ ජන ජයතු ජය මංගලානී

හෙළ දෙරණ ජන ජයතු ජය මංගලානී

බුද්ධානුභාවේන සිත් නෙත් පහන් වී...

ගායනය, සංගීතය - නන්දා මාලිනී

පද රචනය - සුනිල් ආරියරත්න

3. උදෑසන නැග එන හිරු සමගින් පිපෙනා පැතුම් පොදි ගැනයි මේ ගීතය.

සිරි සමනොළ සිරසින් මුදුන් වන

දහසක් අපගේ ප්‍රාර්ථනා

මහාවැලිය මහ ගඟ උතුරා යන 

සුවිපුල් නිවහල් ප්‍රාර්ථනා

අලුත් ඉරෙන් මුළු රටට උදා වන

අමයුරු සුමියුරු ප්‍රාර්ථනා

යව්වනියන්ගේ හද තුළ නලියන

ආදරයේ රස ප්‍රාර්ථනා

ප්‍රාර්ථනා ප්‍රාර්ථනා

ආදරයේ රස ප්‍රාර්ථනා

මල් ගොමුවට බිඟු මිණි දැල් බන්දා

පිපී පිපී එන ප්‍රාර්ථනා

ගෙන් ගෙට යා වන බිළිඳු සිනාවෙන්

දිව එන සුරතල් ප්‍රාර්ථනා

ප්‍රාර්ථනා ප්‍රාර්ථනා

දිව එන සුරතල් ප්‍රාර්ථනා

ගායනය: පණ්ඩිත් අමරදේව ඇතුළු පිරිස

4. පිනිබර යාමයේ අවදිවෙලා ඉරටත් කළින් ගෙදරට ඉරේ ආලෝකය බෙදන අම්මා... කරුණාරත්න දිවුල්ගනේ ගායන ශිල්පියාගේ 'ගමට කළින් හිරු' ගීතයත් මීට සමාන තේමාවකින් යුතු වුණ ගීතයක්.

පිනිබර යාමේ සැවුලන් හඬලනවා

අම්මා වටකර ලිප ගිනි මැලවෙනවා

කොළඹ රේල්ලුව රජ ගමනක එනවා

නැගිටින් පුතුනේ බිම්මල් හිනැහෙනවා....//

පුතුනේ අකුරට යන්න පමාවී

ගුරු සිත රිදිලා වේවැල් හඩවාවී

ගඟේ ඇලේ පැන තෙප්පම් පැදලා

මුරණ්ඩු වුදා.... දුක්වේවී අම්මා...

පිනිබර යාමේ....

වේල දෙව්ලේ කුසගිනි නොබලා

කඩමලුඇන්දත් පින්කඳ බැබලෙනවා

කලට රුවන් වැසි වස්සන කාලේ

ශිල්ප උගත් දා... නුඹ සක්විති වෙනවා.....

පිනිබර යාමේ...

ගායනය - සුනිල් එදිරිසිංහ

ගී පද - ලූෂන් බුලත්සිංහල 

ගී තනුව - වික්ටර් රත්නායක

5. වැඩිය ඇහෙන්නේ නැති, මම ආසම ගීතයක්.

අරුණු වළා පෙළ නැගෙනු බලා

රණඹර අවදි වෙලා

කිරණ සලා මිහිමඬල දොවා

සූරිය මල පිපිලා //

ගලා හැලේ මේ උදේ සිතෙන් සිත

පහන් හැඟුම් පිරිලා

පොළෝ තලේ සත් පියුම් ලෙසින් ඇත

මිනිස් මහිම පිපිලා

අරුණු වළා පෙළ නැගෙනු බලා...

දොරින් දොරට සුබ පැතුම් පුදා යන

සිහිල් නළින් සැරසී

පහන් දොරින් හිරු එබී බලා

නව ලොවෙන් සිනා අයදී

ගායනය: අමරසිරි පීරිස්

පද රචනය: කුමාරදාස සපුතන්ත්‍රි

සංගීතය: රෝහණ වීරසිංහ

6. මේ මිහිරි ගීතය මේ පරණ සංගීතයත් එක්ක හොයාගත්තෙ අමාරුවෙන්. මෑත කාලීන සංගීතයත් එක්ක තියෙනවා මේ වගේ මිහිරිව අහං ඉන්න බැහැ.

ඉර පායා - ඉර පායා

කළුවර හදකට - අවපස සඳකට

ඉර පායා - ඉර පායා

අලුත් දවසකට - නව මං පෙතකට

ඉර පායා - ඉර පායා

එදා මෙදා තුර බිය සැක රැන්දූ

රුදුරු වෙසක් හද තුළ නිති රැන්දූ

අඳුරු තිමිරපට ඉරා දිනින්දූ

සොඳුරු හෙටක් සාදයි මන බැන්දූ

ඉර පායා.....

ගිමන නිවන සිහිලැල් ගඟුලක් සේ

දසත දිවෙන මහනෙල් සුවඳක් සේ

දැවෙන ගතට සුව දෙන ඔසුවක් සේ

ඉර පායා ඇත අඳුර මියෙන සේ//

7. සුබ උදෑසනක් වේවා... ඔබට සුබ උදෑසනක් වේවා...

සුබ උදෑසනක් වේවා

ඔබට සුබ උදෑසනක් වේවා

අලුත් ඉරක් පායයි අද අහසේ

අලුත් දිනට පිබිදෙනු මැන සුවසේ

සුබ උදෑසනක් වේවා

ඔබට සුබ උදෑසනක් වේවා

ගුණ නුවණින් මුළු දවස ගෙවන්නට

මොහොතක් හෝ අපතේ නො යවන්නට

සිත කය වෙහෙසා වැඩෙහි යෙදෙන්නට

සැරසෙමු අද දින සරු කර ගන්නට

රටට දැයට මෙහෙයක් සලසන්නට

මිනිස් වගට සැනසීමක් දෙන්නට

දිරියෙන් සවියෙන් බල ලැබ ගන්නට

ඉටා ගනිමු අද සතුටින් ඉන්නට

සුබ උදෑසනක් වේවා...

සුබ උදෑසනක් වේවා

ඔබට සුබ උදෑසනක් වේවා

සුබ උදෑසනක් වේවා ////

පද රචනය: පයස් ප්‍රනාන්දු

සංගීතය හා ගායනය: අයිවෝ ඩෙනිස්

8. මෙත් මල් පිබිදේවා...

මෙත් මල් පිබිදේවා 

සිත් තුල මෙත් මල් පිබිදේවා

කරුණා ගුණ දේවා 

සිත් තුල කරුණා ඉතිරේවා //

තණ්හා අශා වෛරේ ක්‍රෝධේ 

සංකා නැති වේවා //

පාපේ ද්වේශේ මෝහේ මානේ 

මෙලොවින් දුරු වේවා

මෙත් මල් පිබිදේවා 

සිත් තුල මෙත් මල් පිබිදේවා

කරුණා ගුණ දේවා 

සිත් තුල කරුණා ඉතිරේවා

සමගිය සාමේ දෑ අනුරාගේ

යුතුකම් රජවේවා //

හොර බොරු වංචා බිය සැක දුරු වී 

සැමටම සෙත් වේවා

මෙත් මල් පිබිදේවා 

සිත් තුල මෙත් මල් පිබිදේවා

කරුණා ගුණ දේවා 

සිත් තුල කරුණා ඉතිරේවා //

ගායනය - මොරිස් දහනායක

පද රචනය - සිරිල් ඒ. සීලවිමල

සංගීතය - ස්ටන්ලි එම්. ප්‍රනාන්දු

9. දුක සැප දෙක පෙරළි පෙරළි යයි... යන කාලය නැත නවතින්නේ...

අවදිවන්න අවදිවන්න දීප්තිමත්

දිනකි උදා වෙලා තියෙන්නේ

සිතනවාට වඩා සොඳුරු

විනෝද බර ලෝකෙක අපි ජීවත් වෙන්නේ //

සුසුම් හෙළන කලට දුක් වෙලා

ඔබත් සමග කවුද හඬන්නේ

ටිකක් සතුටු වන්න සැනසිලා

දහසක් ඒ ලෙස හිනැහෙන්නේ

අවදි වන්න අවදි වන්න...

බලනු මැනවි කුරුලු කැදැල්ලේ

සතුට සැපත රස ඉතිරෙන්නේ //

එහෙම ඉඳිමු සිත සැනසිල්ලේ

දුකිනි මිනිස් කම ලැබ ගන්නේ

අවදි වන්න අවදි වන්න...

දුක සැප දෙක පෙරළි පෙරළි යයි

යන කාලය නැත නවතින්නේ //

ඊයෙ වගෙද අද ටිකක් සුබයි

අදට වඩා හෙට හොඳ වෙන්නේ

අවදි වන්න අවදි වන්න...

පද රචනය: කරුණාරත්න අබේසේකර

සංගීතය: පැට්‍රික් දෙනිපිටිය

ගායනය: සී. ටී. ප්‍රනාන්දු

10. සමනළ මුදුනේ සිරිපද සිඹ සිඹ.....

සමනළ මුදුනේ සිරිපද සිඹ සිඹ

උදා ඉරක් පායයි

සැනසිලි සුව දෙන නව මල්සුවඳින්

දැහැමි දැයක් පිබිදෙයි

කුලමල ධනබල නොතකන හෙළදැය

සුදු බුදුරැස් පැතිරෙයි

සම මෙත්කරුණා බුදුබණ පදයක

සිහිලෙන් රට සැනැහෙයි

මිනිසා මිනිසකු විලසින් එළඹෙන

නව යුගයක් ඇරැඹෙයි

තුන් සිංහලය ම අත්වැල් බැඳගෙන

නිවහල් සුවය විඳියි

ගැයුම - එච්. ආර්. ජෝතිපාල සමග ලතා වල්පොල

ගේයපද - ආර්. පේ‍්‍රමදාස

ගීතනුව සහ සංගීතය - සරත් දසනායක

11. Morning Has Broken - Original singer is Cat Stevens, but my favorite version is by Nana Mouskouri.

Morning has broken like the first morning

Blackbird has spoken like the first bird

Praise for the singing

Praise for the morning

Praise for them springing fresh from the world

Sweet the rain's new fall, sunlit from heaven

Like the first dew fall on the first grass

Praise for the sweetness of the wet garden

Sprung in completeness where his feet pass

Mine is the sunlight, mine is the morning

Born of the one light Eden saw play

Praise with elation, praise every morning

God's recreation of the new day

Morning has broken like the first morning

Blackbird has spoken like the first bird

Praise for the singing

Praise for the morning

Praise for them springing fresh from the world

12. Classical Music - 'Morning Mood' Composed by Edward Grieg (1843-1907)

ඔයාලා හැම දෙනාටම සුබ උදෑසනක්! සුබ දවසක්! :)

276. පිළිතුරක්...

The universe always falls in love with the stubborn heart! - Meghana Khurana

මං නිතර යන එන, ලස්සන සටහන් පිරුණ ඉසව්වක් තමයි හෂාන් රන්දිකගේ 'The Traverlers Blog'. මේ එතන හෂාන් ලියලා තිබුණ පැදි පෙළක් සහ, මං එකතු කරපු පිළිතුර.

හෂාන්ගේ පැදි පෙළ - 'තවමත් එහෙම ද?':

රාත්‍රිය කලුවරට 

තනිකමක් දැනෙනව ද?

මද සුළඟ මේ දැනුත්

සුවඳ ගෙන හමනව ද?

වාරුවට උරහිසක්

නැති අඩුව දැනෙනව ද?

තාරකාවෙන් තවත්

මග නොමග අහනව ද?

මල් නැතත් ඒ උයනෙ 

ලිය මඩුලු එතෙනව ද?

කණාමැදිරින් රෑන

ඔහේ සැරිසරනව ද?

මගහැරී ගිය යමක්

උන් අදත් හොයනව ද?

මං නැතත් තවම ඔහෙ

හඳ එළිය වැටෙනව ද?

මං ලියාපු පිළිතුර:

රැයේ කලුවර - නැතේ තනි කම

පිපේ ගිනිකණ - වැටෙන එළි වට

මද සුළං පොද - ගෙනෙන වා රළ

මුසුව ඇත්තෙද - පාසි මුඩු ගඳ

වාරු ගන්නට - උරහිසක් මොට

දෑත ඇත මට - හිස හොවන්නට

මග අසන්නට - තරු ඇවැසි නැත

හිස හැරුණු අත - වේය හරි මග

මල් වැරූ ලිය - මඩුලු උදුරා

ගිනි තබා අළු - වළ දමා ඇත

කණා මැදිරින් - සරා දස අත

සොයයි නැති වූ - එළිය කොයිබද

මිලින සඳ වත - අතු පතර සර

බිඳුනු හද හැඩ - මවයි ගෙමිදුල

තනි කමක් නැත - පාළුවක් නැත

තවම එහෙම ය - මුරණ්ඩුය මම

275. ඇසෙනා අමයුරු සදහම් රාවේ ඉසිපතනේ මිගදායේ...

ඇසළ පෝය සඳ - නුබ හිස බැබැළෙන

බෙදනා සිහිලස - මුදු නළ පහසක

සුපහන් කරවයි - කම්පිත වූ මන

ඇසෙනා අමයුරු සදහම් රාවේ

ඉසිපතනේ මිගදායේ.....

සුදු ඇත් පොව්වෙකු වී - මව් මහමායා

කුස වෙත වැඩියා සුර කුමරා

ඇසළ පෝය සඳ - දිලෙන අහස යට

සිදුහත් බෝසත් සුර කුමරාණන්

මිහිකත නැළැවූවා.....

කිරිකැටි රන් පුතු - රාහුල කුමරුන්

හැරදා සෙනෙහැති යශෝදරාවන්

ඇසළ පෝය සඳ - දිලෙන අහස යට

මහ අභිනික්මන් කළ නිරිඳාණන්

තුන් ලොව සැනැසූවා.....

216. හිරු කිරණ, දුහුවිල්ල - එක්ව මැවු හසරැල්ල...

කවුළු පියන් පත් අතරින්

ගලා ඇවිත් හොර රහසෙන්

රන් ලා හිරු රැස් ගේ බිම

රටා මවනවා...

සුළඟේ නැලැවෙන තිර රෙදි

තාලෙට ඒ එළිය කැටිති

ගං දිය රැළි වාගේ බිම

දුව පැන යනවා...

ඒ එළි දහරා අතරේ

පාවෙන දිලිහෙන දුහුවිලි

අල්ලන්නට මා පොඩි පුතු

දෝත පානවා...

රන් හිරු රැස් වැටී දිලෙන

රන් කැටි කිරි සිනහ මුහුණ

හිරු දුටු මල් කැකුළක් මෙන්

පිපී දිලෙනවා...

215. දිව්‍යමය ආදරය...

රන්කැටි දෑත් මාලය

පලන්දා ගෙල වට

'ආදරෙයි' කියමින

සුවඳැති හාදු දෙන විට

වෙන කුමක් ඇවැසිද 

ඒ දිව්‍යමය ආදරය හැර...

206. සක්විති කිත් රැස යුත් සිරි ලංකා - වික්මැති පුත් පෙළ ලත් සිරි ලංකා...

සක්විති කිත් රැස යුත් සිරි ළංකා

වික්මැති පුත් පෙළ ලත් සිරි ළංකා

සෙත් සිරි ළංකා - සෙත් සිරි ළංකා

සසිරි අසිරි සිරිනී සිරි ළංකා

මහ සම්මත මනු ලෝ මුල් නිරිඳුන්

රං පරපුර දඹදිවට ද හෙළි දුන්

තෙදණින් කිරණින් පැරැයූ දිනිඳුන්

සසිරි අසිරි සිරිනී සිරි ළංකා

අමල කොමළ ලලනී සිරි ළංකා

මිහිරි රුසිරි කුමරී සිරි ළංකා

                  

රන් ගොයමින පැහැ ගෙනැ බබලන්නී

ගංගා ඇළ දොළ සේල අඳින්නී

සදහම් මිණි කැන් බෙදමින් යන්නී

කඳු බඳු දාගැබ් වළා සිඹින්නී

මූදට නෑ කම් වැවු හඟවන්නේ

මිහිපිට දෙව් ලොව මැනුණා වැන්නේ

අසුර රකුස් යක් නා සිව් හෙළයන් 

එක්සත් වී සුපහළ සිංහළයන්

පෙරැ කළ පින් පල පළ කළ බිම හෙළ

අමළ කොමළ ලලනී සිරි ලංකා

මිහිරි රුසිරි කුමරී සිරි ලංකා  

සසිරි අසිරි සිරිනී සිරි ලංකා.......

~~~~~

පද රචනය: අරිසෙන් අහුබුදු ශූරීන්

තනු නිර්මාණය හා ගායනය: පණ්ඩිත් ඩබ්. ඩී. අමරදේවයන්

199. තවත් ගී දාසයක්...

භාරත ගී වින්දන ගැන ලියපු සටහනේදී මම කිව්වා මගේ ප්‍රියතම ඉංග්‍රීසි ගීත ගැනත් සටහනක් ලියන්න හිතාගෙන ඉන්න බව. ඔන්න මේ ලෑස්ති වෙන්නේ ඒ ගැන ලියන්න.

1. Westlife සංගීත කණ්ඩායමේ බොහෝ ගීත වලට මම හුඟක් කැමතියි. මේ ඒ අතුරින් වඩාත් කැමතිම ගීතය. මෙයට අමතරව Seasons in the Sun, My Love ගීත දෙකත් හරිම ආසාවෙන් රස විඳින ගීත.

You raise me up, so I can stand on mountains;

You raise me up to walk on stormy seas;

I am strong when I am on your shoulders;

You raise me up to more than I can be.

2. Boyzone සංගීත කණ්ඩායමේ මම කැමතිම කටහඬ තිබුණේ මේ Ronan Keating ගායකයාට. ඔහු තනියම ගායනා කරන මේ ලස්සන ගීතය, නිකුත් වෙච්ච කාලයේ ඉඳලා මේ වෙනකල්ම මම හරිම ආදරේ කරන ගීතයක්.

The smile on your face lets me know that you need me.

There's a truth in your eyes saying you'll never leave me.

The touch of your hand says you'll catch me wherever I fall.

You say it best when you say nothing at all.

3. Disney චිත්‍රපට සමග නිකුත්වෙන ගීතත් බොහෝ වෙලාවට ඒ චිත්‍රපට වාගේම ආදරේ දිනාගන්නවා. මේ, තියෙන්නේ මම කැමතිම Disney චිත්‍රපට ගීතය. Tangled චිත්‍රපටය වෙනුවෙන් මෙය ගායනා කරන්නේ එහි ප්‍රධාන චරිත ද්විත්වයට හඬකවාපු Mandy Moore සහ Sachary Levy. මෙය හැරෙන්නට මම කැමතිම අනිත් Disney චිත්‍රපට ගීත තමයි Aladdin චිත්‍රපටයේ It's a Whole New World ගීතය සහ Pocahontas චිත්‍රපටයේ Colors of the Wind ගීතය.

All those days watching from the windows

All those years outside looking in

All that time never even knowing

Just how blind I've been

Now I'm here blinking in the starlight

Now I'm here suddenly I see

Standing here it's all so clear

I'm where I'm meant to be

4. ඒ දවස් වල මම ආච්චිත් එක්ක SLBC ගුවන් විදුලි සේවයේ විකාශය වුණ House Wife's Choice වැඩසටහනට කන් දෙන්න පුරුදු වෙලා හිටියා. ඒ වැඩසටහනෙන් ගොඩක් වෙලාවට ඇහුණේ Cowboy Songs. Jim Reeves, Marty Robbins, Hank Snow මම අඳුනගත්තේ එතනින්. මේ ගීතය Jim Reevesගේ සුන්දර ගැඹුරු හඬින් ගැයෙන ආදරණීය ගීතයක්.

Adios amigo, adios my friend

The road we have travelled has come to an end

When two love the same love, one love has to lose

And it's you who she longs for, it's you she will choose

5. මම ගිය ප්‍රාථමික පාසැලේ බටහිර සංගීතය වෙනුවෙන් අපිට දීපු ගීත පොතක් තිබුණා. ගුරුතුමිය ඒ පොතෙන් නියම කරන ගීතය ඊළඟ දවසෙදි හොඳට පාඩම් කරගෙන ඇවිත් පංතියේදී ගායනා කරන අයට රතු තරු ලකුණු ලැබුණා. ඒ වැඩේ මට බොහොම අමාරු වුණා. ඒත්, කිසිම ආයාසයක් නැතුව මට ඉබේම පාඩම් හිටපු ගීතය තමයි මේක. මං හිතන්නේ ආච්චිත් එක්ක පැරණි බටහිර ගීතවලට කන් දීලා හිතේ පැලපදියම් වෙලා තියෙන්න ඇති, සින්දු කියලා ගත්ත මුල්ම රතු තරුව එදා හම්බවුණා. Jamaica Farewell. අන්තර්ජාලයේ විවිධ ගායකයන්ගේ හඬින් මේ ගීතය අහන්න ලැබුණත්, මම දන්න හැටියට මුල් ගායකයා Harry Belafonte.

But I'm sad to say I'm on my way

Won't be back for many a day

My heart is down, my head is turning around

I had to leave a little girl in Kingston town

6. 1999 වසරේදී නිකුත් වූ මෙම Millennium Prayer ගීතය එළැඹුණු නව සහශ්‍රය වෙනුවෙන් වූ ප්‍රාර්ථනාවක්. Cliff Richard ගායකයාගේ මෙම ගීතයට අමතරව Christmas Time ගීතයටත් මම හරිම කැමතියි.

Our Father who art in heaven,

Hallowed be thy name.

Thy Kingdom come. Thy will be done

On earth as in heaven.

7. Zorro චිත්‍රපටය වෙනුවෙන් Mark Anthony සහ Tina Arena ගයන මේ ගීතයේ සංගීතයත් ඔවුන් දෙදෙනාගේ හඬ මුසුවත් සමග දෑස් පියාගත්තාම කොහේදෝ ඈතක අතරමං වෙනවා.

Moon so bright night so fine

Keep your heart here with mine

Life's a dream we are dreaming

Race the moon catch the wind

Ride the night to the end

Seize the day stand up for the light

I want to spend my lifetime loving you

If that is all in life I ever do

8. ගුවන් විදුලියෙන් අහලා පුරුදු, ගොඩක් කැමති ගීතයක්. මේ ගායකයාගේම Country Roads ගීතයත් හරිම ලස්සන මම ආස තව ගීතයක්. You Fill Up My Senses - John Denver

You fill up my senses like a night in the forest,

like the mountains in springtime, like a walk in the rain,

like a storm in the desert, like a sleepy blue ocean.

You fill up my senses, come fill me again.

9. මම පාසැල් ගිය වෑන් රථයේ ගුවන් විදුලිය හරහා දවස ගානේ, උදේ දවල් ඇහිලාම, නොදැනීම රසවිඳින්න, ආදරේ කරන්න පෙළඹුණ ලස්සන ගීතයක්. Right Here Waiting for You - Richard Marx

Wherever you go

Whatever you do

I will be right here waiting for you

Whatever it takes

Or how my heart breaks

I will be right here waiting for you

10. Celine Dione ගායිකාවගේ ගීත බොහොමයකට මම ඉතාම කැමතියි. මේ ඉදිරිපත් කරන ගීතය ඇරෙන්න My Heart Will Go On සහ All Coming Back to Me ඒ අතරින් විශේෂයි.

When you want it the most there's no easy way out

When you're ready to go and your heart's left in doubt

Don't give up on your faith

Love comes to those who believe it

And that's the way it is

11. Oscar Harris ගායකයා ළමුන් පිරිසක් සමග ගයන මේ ගීතය තරමක් පැරණියි. ඉතාම සුන්දර ගීයක්. ඔහුගේ කටහඬ ඉතාමත් අපූරුයි.

Some are black, some stay white

Is it wrong or is it right? 

Feeling strong, feeling light

Every day and every night

12. Heal the World ගීතය පිළිබඳ විශේෂ හැඳින්වීමක් අවශ්‍ය නැහැ කියා හිතනවා. Michael Jackson ගායකයා මනුෂ්‍යත්වය වෙනුවෙන්, සොබාදහම වෙනුවෙන් ගැයූ ගී සදා අමරණීය වනු ඇති බව මගේ හැඟීමයි.

Heal The World

Make It A Better Place

For You And For Me

And The Entire Human Race

There Are People Dying

If You Care Enough

For The Living

Make A Better Place

For You And For Me

13. A Walk to Remember චිත්‍රපටයේදී එහි ප්‍රධාන චරිතය රඟ දක්වන Mandy Moore විසින් ගයනු ලබන Only Hope ගීතයටත් මම ඉතාම කැමතියි. ඒ සමහරවිට ඒ A Walk to Remember නිසා වෙන්නටත් ඇති. :)

There's a song that's inside of my soul

It's the one that I've tried to write over and over again

I'm awake in the infinite cold

But You sing to me over and over and over again

14. ඉංගිරිස් සින්දු වල නෙවෙයි සිංහල සින්දු වලවත් තේරුමක් නොතේරෙන තරම් චූටි කාලේ ඉඳන් මම මේ සින්දුවට, ඒ වචන ගලාගෙන යන රිද්මයට හරිම ආසයි. Sealed with a Kiss - Jason Donovan

Though we've got to say goodbye for the summer

Darling, I promise you this

I'll send you all my love everyday in a letter

Sealed with a kiss

15. ආදරේත් එක්ක හිතට දැනෙන නුහුරු, මිහිරි හැඟුම් ගැන මේ තරම් ලස්සනට ගැයෙන වෙන ගීතයක් තියෙනවද මන්දා. ඉස්සර ඉඳන්ම ගොඩක් ආස ගීතයක්. Top of the World - The Carpenters

I'm on the top of the world lookin' down on creation

And the only explanation I can find

Is the love that I've found ever since you've been around

Your love's put me at the top of the world

16. මේ Wooden Heart ගීතයත් නොයෙක් වර විවිධ ගායක ගායිකාවන් ගයා තිබෙනවා. ඒ අතරින් මම මෙහි පළ කරන්න තෝරාගත්තේ G. I. Blues චිත්‍රපටයේ Elvis Presley ගායනා කරන අපූරු ගීතය.

Can't you see

I love you

Please don't break my heart in two

That's not hard to do

'Cause I don't have a wooden heart

189. භාරත ගී වින්දන...

පහුගිය ටිකේ ගීත වැස්සකට අහු වුණානේ. ඒ වැස්සට තෙමුණා මදි වගේ හැඟීමක් හිතට දැනි දැනි තියෙද්දි රවි අයියා මුළින් තෝරපු ගීත 16ට අමතරව තවත් ගීත එකතු කරනවා දැක්කා. එහෙම දෙයක්වත් කරලා හිතට දැනෙන සාංකාව දුරු කරගන්න වෙලාවක් හොය හොය ඉන්න අතරෙදි සොඳුරු සඳවතී ලියපු විදෙස් ගීත එකතුව දැක්කා. එවෙලෙම හිතුණා මෙහෙම එකක්නම් ලියන්නම ඕනෙ කියලා. ගොඩක් ආදරේ කරන හින්දි ගීත එකතුවකුත්, ඊළඟට ඉංග්‍රීසි ගීත එකතුවකුත් ඉදිරිපත් කරන්නයි ඔන්න දැන් මගේ කල්පනාව. ගීත මතක් කර කර ඉන්න අතරේ හීන දකින්නිත් හින්දි ගීත එකතුවක් පළ කරලා තියෙනවා දැක්කා. ඉයන්, ඔන්න ඔයාගෙ සිගරට් එක පත්තු කරපු බට කොළේට පිං සිද්ධ වෙන්න ආයෙමත් මම ගීත වැස්සකට තෙමෙන්නයි යන්නේ. ඔයාලා හැමදෙනාමත් එක්කම. :)

1. හින්දි ගීත, චිත්‍රපට රසවිඳින්න අපි පෙළඹුනේ අපේ තාත්තා නිසා. අයියාට වඩා මාත් නංගිත් ඒ පැත්තට ගොඩක් නැඹුරු වුණා. ජග්ජීත් සිං හා චිත්‍රා සිං කියන අති දක්ෂ ගස(z)ල් ගායක යුවළගේ ගීත ඔබ අසා ඇතැයි කියා සිතනවා. ඔවුන් දෙදෙනා ලන්ඩන් වල රෝයල් ඇල්බට් ශාලාවේ පවත්වපු සංදර්ශනයක සජීවී පටිගතකිරීම් ඇතුළත් කැසට් පටයක් අපේ ගෙදර තිබුණා. හින්දි ගීත රසවින්දනයේ මුල්ම මතකය බැඳිලා තියෙන්නේ ඒ කැසට් පටයේ ගීතත් එක්ක. ප්‍රේක්ෂයන්ගේ ඔල්වරසන් හඬ පවා ඒ පටයේ ඇතුළත් වුණා. මේ එක වාගේම සුන්දරත්වයකින් යුතු වූ ඒ ගීත එකතුවෙන් එකක්.

2. ආරාධනා. මගේ ඒක පාර්ශ්වික ප්‍රථම ප්‍රේමය වෙච්ච රාජේශ් ඛන්නා ඉන්න ඕනෙම චිත්‍රපටයක ඕනෙම ගීතයකට මම කැමතියි. මේ චිත්‍රපටයේ හැම ගීතයක්ම මට කටපාඩම්. ආරාධනා චිත්‍රපටයට අමතරව, කතිපතන්, අප්නා දේශ්, හාති මෙරේ සාති රාජේශ් ඛන්නා හිටපු හුඟක් ලස්සන ගීත ඇතුළත් සුන්දර චිත්‍රපට. Korakagaz ta yeh man mera

3. මේ 1983 වසරේ තිරගත වුණ Masoom චිත්‍රපටයේ ගීතයක්. චිත්‍රපටයනම් බලලා නැති වුණත් ගීතයනම් ගොඩක් රසවිඳිනවා. මගේ පැංචාටත් මම නිතර බලන්න දෙන ගීතයක්. Ladki ki kaathi.

4. ස්වාධීන රූපවාහිනියේ විකාශය වුණ 'භාරත ගී වින්දන' වැඩසටහන අපි හැමෝම එකට ඉඳගෙන රසවිඳපු වැඩසටහනක්. මේ ගීතයත්, ඊළඟ ගීතයත්, ඒ වැඩසටහනේදී මම නිතර දැකපු හුඟක් ලස්සන ගීත දෙකක්. මේ ගීතය 1975 වසරේ තිරගත වුණ Sholay චිත්‍රපටයෙන්.

5. මේ ගීතය Dosti චිත්‍රපටයෙන්. මම හුඟක් ආදරේ කරන ගීතයක්. Koi jab rahna paye

6, 7, 8. අපි පොඩි කාලේ අපේ ගෙදර රූපවාහිනියක් නොතිබුණ කාලයක් තිබුණ බව මම කළින් ලිපියෙදිත් කිව්වා මං හිතන්නේ. ඒ කාළෙදි නංගියි මායි රෑ වෙද්දි ගුවන් විදුලියේ සිටි එෆ් එම් සුසර කරගෙන ලෑස්ති වෙන්නෙ පැරණි හින්දි ගීත අහන්න. ඒ සිටි එෆ් එම් හරහා දෑස් වසාගෙන රස විඳපු ඉතාම සුන්දර ගීත ගොන්නක් අතරින් මේ ගීත ත්‍රිත්වය අමාරුවෙන් තෝරගත්තා. ගුවන් විදුලියෙන් ඒ ගීත අහද්දි හිතේ මැවුණ චිත්ත රූප වලට වඩා හාත්පසින්ම වෙනස් වෙච්ච රූප රාමු පෙළක් එක්ක පස්සෙ කාලෙකදි මේ ගීත නැරඹුවාම හිතට පුංචි දුකකුත් නොදැනුණාම නෙවෙයි. ඒත් ඉතිං ගීතයේ රසයේ වෙනසක් නෑනේ.

Yeh mera prem patra padhkar

Kya huva tera vaada

Nisultanaare

9. මොහොමඩ් රාෆි. පැරණි හින්දි ගී අතරින් මා අසා තිබෙන ලයාන්විතම ගීතය ගයා ඇත්තේ එතුමන්. Dulari චිත්‍රපටයේ Suhani Raat ගීතය. 

10. මේ තියෙන්නේ මම ජීවිතේට අහපු දිගම ගීතය. ඒ වගේම ඉතාමත් ආදරේ කරන, හොය හොයා අහන ගීත අතර පෙරමුණේම ඉන්න ගීතය. Border චිත්‍රපටයත් ඉතාම සුන්දරයි. 

11. Parineeta චිත්‍රපටය වගේම ඒ චිත්‍රපටයේ හැම ගීතයක්ම ඉතාමත් ලස්සනයි. සෝනු නිගම්, වර්තමාන හින්දි ගායකයන් අතරින් මගේ ප්‍රියතම ගායකයා. 

12. මේක මහා පුදුම ගීතයක්. මේක මම මුළින්ම ඇහුවේ අපේ පාසැලෙන් සංවිධානය කරපු ප්‍රසංගයකදි සහෝදර පාසලක සොයුරෙක් වේදිකාවේ මේ ගීතය ගයපු මොහොතේ. ඉන්දියානු කුර්තා ඇඳුමකින් සැරසී ඔහු මේ ගීතය ඉතාමත් ලස්සනට ගැයුවා. අන්තර්ජාලයෙන් මේ ගීතය මා නැරඹුවේ ඉන් වසර ගණනාවකට පසු. කොයි තරම් ලස්සන ගීතයක්ද. Chandi jaisa rang hai tera.

13. 1942 A Love Story චිත්‍රපටය ගැන මම ආයෙ අමුතුවෙන් කියන්න ඕන වෙන්නෙ නෑනේ. ඉතාම සුන්දර ගීත ගොන්නක්ම පිරුණ ලස්සන චිත්‍රපටයක්. මේ ඒ ගීත අතරින් මම කැමතිම ගීතය.

14. අමීර් ඛාන්ට මම කැමති ඔහුගේ රඟපෑමේ වගේම ඔහු නිර්මාණය කරපු චිත්‍රපට වලත් තියෙන අති සුපරික්ෂාකාරී බව හින්දා. Taare zameen par ගත්තත් Lagaan ගත්තත් කියන්න කිසිම අඩුවක් මටනම් දැනෙන්නේ නෑ. මේ සුන්දර ගීතය ලගාන් චිත්‍රපටයෙන්.

15. Mission Kashmir චිත්‍රපටය සාමාන්‍ය කතා තේමාවක් තියෙන සාමාන්‍ය කතාවක් වුණත් ඒ චිත්‍රපටයේ ගීත හරිම ලස්සනයි. මේ ඒ අතරින් මම කැමතිම ගීතය.

16. ඉතාමත් මෑතකදි මගේ කනට ඇහුණ හින්දි ගීත අතරින් මගේ හිත නතර කරගත්ත ගීතය තමයි මේ. 

ඉතින් ඔන්න හින්දි ගී වරුසාව නිමා වුණා. සිංහල ගීත වගේ නෙවෙයි, මේ ගීත බොහොම දිගයි. ඒ නිසා මේවා අහද්දි වැඩිපුර බයිට් පිච්චෙනවා. ඒ ගැන සමා වෙන්ඩ ඕමනයි. :)