පෙම්බර්ලි මන්දිරය,
ඩර්බිශයර් ප්රාන්තය.
දයාබර සොයුරිය ජේන් වෙත,
ඔබට පවසන්නට ඇති දෑ බොහෝ වන නමුත් කෙලෙසින්, කොතැනින් අරඹන්නටදැයි මා හට සිතාගත නොහැක. කෙළිදෙළෙන් ඇදී ගිය සිහිලැල් දොළ කඩිත්තක් නොසිතූ විරූ මොහොතක දියඇල්ලකින් ඇද හැලී මහා ගංගාවකට එක් වී ඇති බවක් මට හැඟේ. එය මහා වෙනසකි; නමුදු සිත තෘප්තියෙන් පුරවාලන, ප්රේමයෙන් සනහාලන වෙනසකි.
එසේය මා සොයුරිය. කලෙක බොහෝ සෙයින් අප්රිය කළ පුද්ගලයෙකු හා මා මෙලෙසින් පෙමින් වෙලුනේ කෙසේදැයි යන්න මට තවමත් සිතාගත නොහැක. නෙදර්ෆීල්ඩ් මන්දිරයේ නෘත්යෝත්සවය දා අප මුල්වරට දුටු එම උඩඟු මාන්නක්කාර උද්දච්ච මිනිසා සතුව මෙතරම් ම දයාබරිත හදවතක් ඇති බව මා සිහිනෙකිනුදු බලාපොරොත්තු වූයේ නැත. ඔබගේ බිංග්ලි මහතා වැනි ප්රියමනාප තැනැත්තෙකු, එවැන්නෙකු සිය සමීපතම මිතුරා කරගත්තේ මන්දැයි අප පුදුම වූ සැටි ඔබට මතකද? මම තවදුරටත් ඒ ගැන පුදුම නොවෙමි. ඔහු තරම් තම සමීපතමයන් වෙනුවෙන් හෘදයාංගමව කැපවන වෙනත් අයෙකු මා දැක ඇත්නම්, ජේන් ඒ ඔබම පමණි. ඔබගේ දයාබරිත බව ඔහු මෙම මන්දිරයේ සේවකයන් වෙත දක්වනා හිතවත් බව තුළ, සිය නැගණිය වෙනුවෙන් දක්වනා සෙනෙහස තුළ මම දකිමි. ආදරණීය ජෝර්ජියානා මා හට නිබඳවම අපගේ කුඩා නැගණියන් සිහි කරන්නීය. ලිඩියාගේ වියෙහි ම පසු වුවද ජෝර්ජියානා ඈ තරම් දඟකාර නැත, සිය සොයුරාට බෙහෙවින් ම කීකරු ය, මටද ඉතාමත් ලැදි ය. ඇගේ පියානෝ වාදනය නම් ඔබ ඇසිය යුතුමය.
මා ඔහුට බොහෝ දොස් නගා ඇත. ඔබ හා එක්ව ඔහු හෙළා දකිමින් කතා කොට ඇත. ඒ සියල්ල ගැන මම අද පසුතැවෙමි. පෙරදී ඔහු කෙරෙහි මා සිතෙහි වූ ප්රතිරූපය කොතෙක් සාවද්යදැයි යන්න ඔහු මට දිනෙන් දින පසක් කර පෙන්වන්නේය. විකම් හා එක්ව අපගේ ලිඩියා සිදු කළ හිතුවක්කාර ක්රියාව, අප පවුලට අපවාදයක් නොනැගෙන සේ විසඳාලන්නට ඔහු මැදිහත් වූ අන්දම ඔබ දැනටමත් දන්නා නිසා මම ඒ ගැන නැවත මෙහි සඳහන් නොකරමි. නමුත්, විකම්ගේ දුර්දාන්ත ඉතිහාසය පිළිබඳ හොඳින්ම දන්නා තැනැත්තෙකු ලෙස ඩාර්සි නිරන්තරයෙන් ඔවුන් ගැන සොයා බලමින් ඔවුන්ගේ යහ පැවැත්ම තහවුරු කරන්නට කටයුතු කරනා බව මා පවසන්නේ ආඩම්බරයෙනි. කැතරින් ආර්යාව ඔහු සිය ඥාති පුත්රයා වීමෙන් පමණක් නොසෑහී සිය දියණියද ඔහුට අවාහ කර දෙන්නට එතරම්ම වෙහෙසුණේ දේපළ උරුමය නිසාම පමණක් නොවන්නට ඇතැයි දැන් මට සිතේ. පවුලකට ඔහු ලබා දෙන වටිනාකම, එම සියලු දේපළ උරුමයන් පරයන අන්දමේ වටිනාකමකි.
ජේන්, හර්ට්ෆොර්ඩ්ශයර් හි ඔබ ද, නැගණියන් ද සමග මවුපිය සෙවණේ එක්ව ගෙවූ ඒ කෙළිලොල් සමය, නොසිතූ විරූ ලෙස මෙබඳු වෙනස් මාවතක් වෙත යොමු වනු ඇතැයි මා කිසිදා බලාපොරොත්තු වූයේ නැත. ඔබ, ලිඩියා පමණක් නොව, මා හට ගැලපෙන සහකරුවෙකු සොයාගන්නට මේරි සහ කිටීද විවාහ දිවියට එළැඹෙන තුරු හැකි වනු ඇතැයි මා සිතුවේ නැත. නමුත් ඩාර්සි, මාගේ ඩාර්සි, ඒ සියල්ල වෙනස් කළේය. ඔහු මා ද, මාගේ සිතුවිලි ද උඩුයටිකුරු කළේය. පොතපත කියැවීමෙන් මා ලබා සිටියේයැයි මා සිතා සිටි 'පාණ්ඩිත්යය', ඔහු අභියස හුදෙක් හරසුන් අගතිගාමී මුග්ධ බවක් බවට පත් විය. පොතපත පමණක් නොව, මිනිසුන්ද ජීවිතයද කියැවීමට මා උගත යුතු බව ඔහු මට කියා දුන්නේය.
මේ සියලු මානව හිතවාදී ගුණාංගයන් මැද ඔහු මා වෙත දක්වන ප්රේමණීය බව ගැන ඔබට සිතාගත හැකිද? බිංග්ලි මහතාගෙන් ඔබද ඉතා භාග්යවන්ත ප්රේමයක් අත්විඳිනා බව මම දනිමි. නමුදු ඔහු එදා පටන් ම ඔබ වෙත දැක්වූ ප්රේමණීය ගෞරවය පිළිබඳ දන්නා මම ඒ ගැන පුදුම නොවෙමි. ඔබ සෑම සියලු ආකාරයකින්ම එම මාහැඟි ප්රේමයට උරුමකම් කියන්නියකි. නමුත් මා? ගෙවුණු දිනෙක සන්ධ්යාවේ මන්දිරයට නුදුරින් ගලා යන කුඩා අතු ගංගාවේ මා ද කැටුව ඔරුවක් පැද ගිය ඔහු, නිසල තොටුපොළක ඔරුව නවතා මා හා තරු දෙස බලමින් කතා කියූ බව මා පැවසුවහොත් ඔබ පිළිගන්නවාද? එසේය, ඔබ මෙන්ම මා ද මා ගැන තවම පුදුමයෙනි.
සුවිසල් පෙම්බර්ලි වතුයාය මධ්යයේ පිහිටි මෙම නිවහන සැබැවින්ම සොඳුරු කලාගාරයකි. එහි හිමිකරුගේ පියඹ ලෙස මා මෙහි සපැමිණ ගෙවුණු දෙමසකට ආසන්න කාලය පිළිබඳ සියල් තොරතුරු මෙලෙසින් අකුරු කිරීම අපහසු කරුණකි. එබැවින්, නුදුරු දිනෙකදී ඔබ හමු වී ඉතිරි ඕපාදූප සියල්ල දොඩන්නට මම මාගේ ඩාර්සි සමගින් පැමිණෙමි. එතෙක් මා හිතාදර සොයුරිය, ඔබට ආයුබෝවන්. සුවෙන්, සතුටින් වෙසෙන්න.
මේ ඔබේ සදාදරණීය,
ලිසී
(එලිසබත් බෙනට් ඩාර්සි)
