ගුගුරමින් අහස් කුස
අඳුරු වී දස අතම
වැටෙන වැහි පොද සමග
පොර බදන කුඩ කබල
වීසි කර පැත්තකට
තෙමි තෙමී මව විගස
දිව ගියේ මග වෙතට
සොයා පොඩි දුවණියව
අනේ මේ ගෙරවිල්ල
නවතින්නෙ නැද්ද අද
මගෙ පුංචි කෙලි පොඩ්ඩ
බය වෙලා අඬනවද
ගෙදරදී මං ලඟම
යන්නෙ නෑ එලෙව්වට
ගෙරවිල්ලෙ මහ හඬට
බයයි මගෙ පොඩි කෙල්ල
මව ඔහොම එන අතර
පොඩි දෝණි එයි පෙරට
ඇගෙ මුහුණෙ බයක් නැත
දෑස් දිලිසේ යසට
මව බලා ඉන්නවා
පුදුම වී නෙත් අයා
අද දෝණි බය නැතුව
හිනා වී ඉන්නවා
ලඟට ආ පොඩි දෝණි
ආදරෙන් තුරුළු කර
යන අතර අම්මා ඒ
විස්තරය අහනවා
අම්මෙ මං අද තමයි
දැක්කෙ ගෙරවිල්ලෙ හැටි
ආයෙනං ගෙරෙව්වට
මං නෙවෙයි බය වෙන්නෙ
අම්මා හරි පුදුම වී
ඒ රහස ගැන අසයි
ආයෙමත් විදුලියක්
දෝණි හිනැහී බලයි
අන්න අම්මේ ආයෙ
මගෙ ෆොටෝ එක ගත්තා
මේ ටිකට මගෙ ෆොටෝ
මහ ගොඩක් අරගත්තා
ඔන්න අම්මත් ඉතිං
හිනා වීලා ඉන්න
දෙන්නාම ඉන්න කොට
ෆොටෝ එක එයි හොඳට
~ ඊමේල් පණිවිඩයක තිබුණ ලස්සන කතාන්දරයක් ඇසුරෙනි...
