200. Me Before You...

Will Traynor and Louisa Clark - from the movie 'Me Before You'

ක්ලාර්ක්,

ඔයා මේ ලියමන කියවද්දි මං හිතන්නේ සති දෙක තුනක් විතර පහු වෙලා ඇති (ඔයාගෙ අලුතෙන් හොයාගැනුණු සංවිධානාත්මක කුසලතා එක්ක වුණත් ඔයාට සැප්තැම්බර් මුළට කළින් පැරිසියට යන්න පුළුවන් වෙයි කියලා මං හිතන්නෙ නෑ). පදික වේදිකාව උඩ කොයිම විදිහකින්වත් කෙළින් තියාගන්න බැරි අර යකඩ පුටුවක් උඩට වෙලා ඔයා දැන් ඔය බොන කෝපි කෝප්පෙ හොඳ රසට සුවඳට ඇති කියලා මං හිතනවා. කිඹුලා බනිස් ගෙඩියත් උණු උණුවෙන්ම ඇති. මාර්ක්විස් හෝටලේ හොඳ තැනක්. ආපහු දවල් කෑම වේලටත් ඔතනට එන්න බලාපොරොත්තුවක් තියෙනවනං, ඔතන මාළුත් සෑහෙන්න හොඳයි. ඔතන ඉඳන් වම් පැත්තට හැරිලා බැලුවොත් ඔයාට පෙනෙයි ලෙ'ආර්ටිසන් සුවඳ විළවුන්හළ. මේ ලියුම කියවලා ඉවර වුණාට පස්සේ ඔයා එතනට ගිහින් පැපිලොන්ස් එක්ස්ට්‍රීම් වගේ නමක් තියෙන ජාතියක් තියෙනවා (නම හරියටම මතක නැහැ), ඒක අරගන්න. මට කොයිවෙලෙත් හිතුණ දෙයක් තමයි ඒ සුවඳ ඔයාට හොඳට ගැලපෙයි කියන එක.
 
හරි එහෙනං, උපදෙස් ඉවරයි. කරුණු කීපයක් තියෙනවා මට ඔයාට කියන්න ඕන වුණ, කෙළින්ම ඔයාට කියන්න තිබුණ, ඒත් 1) මං කියන එක අහං ඉන්න එක පැත්තක තියලා ඔයා අඬන්න පටන්ගනියි, 2) මං මේ කියන්න හදන එක ඔයා මට කියන්න දෙන්නෙ නැති වෙයි. කොයි වෙලෙත් ඔයාගෙ කියවිල්ලනේ.
 
ඉතින් මේකයි මට කියන්න ඕන වුණේ: මයිකල් ලෝලර්ගෙන් ඔයාට ලැබුණ මුල් කවරයේ තිබ්බ චෙක් එක මුළු මුදලම නෙවෙයි, ඒක ඔයාට රස්සාවක් නැතුව ගෙවන්න වෙන මුල් සති කීපයටත් ඔයාට පැරිසියට එන්නත් දීපු පොඩි තෑග්ගක් විතරයි.
 
ආපහු එංගලන්තෙට ගියාට පස්සේ, මයිකල්ගේ ලන්ඩන් කාර්යාලයට මේ ලියුම අරගෙන යන්න, එතකොට එයා දෙයි ඔයාගෙ නමින් මං වෙනුවෙන් එයා ඇරපු ගිණුමක ලියකියවිලි. ඒ ගිණුමේ තියෙනවා ඔයාට නවතින්න හොඳ තැනක් ගන්නත්, ඔයාගේ උපාධියටත්, ඒ උපාධිය කරනකල් ඔයාට ජීවත් වෙන්නත් ඕන කරන මුදල්.
 
මගේ අම්මලාට මේ ගැන දැනුම් දෙයි. මේ ලියුමත්, මයිකල් ලෝලර්ගේ ලියකියවිලිත් නිසා ඒ ගොල්ලෝ වැඩි කලබලයක් කරන එකක් නෑ කියලා මං හිතනවා.
 
ක්ලාර්ක්, මට දැන් ඇහෙනවා වගේ ඔයා මහ හයියෙන් හුස්ම ගන්න හැටි. මේක ගැන බයවෙන්නවත්, මේක අතඇරලා දාන්න හදන්නවත් එපා - ඔයාගෙ ඉතිරි මුළු ජීවිත කාලෙටම ඔහේ පුටුවක් උඩට වෙලා පස්ස රත් කර කර ඉන්න පුළුවන් වෙන තරං සල්ලියක් ඒකෙ නෑ. ඒත් ඒකෙන්, ඔය අපි දෙන්නම ගම කියලා කියන, ලෝකෙන් හැංගිච්ච පොඩි නගරෙනුත්, මෙච්චර කල් ඔයා ගන්න ඕනෙ කියලා හිතාගෙන ගත්ත තීරණ වලිනුත් ඔයාට නිදහස් වෙන්න පුළුවන් වෙයි.

මං මේ සල්ලි ඔයාට දෙන්නෙ, ඒ ගැනම හූල්ල හූල්ල ඔයා කල්පනා කරනවා බලන්නවත්, ඔයාව ණයකාරියක් කරවන්නවත් නෙවෙයි. මේක කොහෙත්ම මගෙන් ලැබෙන මළ ඉලව් සිහිවටනෙකුත් නෙවෙයි.

මං ඒ සල්ලි ඔයාට දෙන්නෙ, තව දුරටත් මාව සතුටු කරන්න පුළුවන් දේවල් මේ ලෝකෙ ඉතුරු වෙලා නැති වුණත්, ඔයාට සතුටු වෙන්න පුළුවන් ගොඩක් දේවල් මේ ලෝකේ තියෙන නිසා.
 
මං දන්නවා, මාව අඳුනගන්න ලැබුණ එකෙන් අන්තිමට ඔයාට දුකක්, වේදනාවක් ඉතුරු වුණා කියලා. ඒත් ඔයාට මාත් එක්ක තියෙන කේන්තිය අඩු වෙච්ච කාලෙක, ඔයාගෙ හිත හදාගන්න පුළුවන් වෙච්ච කාලෙක ඔයාට තේරෙයි මට මං කරපු දේ ඇර වෙන කරන්න දෙයක් ඉතිරි වෙලා තිබ්බෙ නැති බවත්, ඔයා මාව මුණ නොගැහී හිටියනම් ඔයාට ලැබෙන්න තිබුණ ජීවිතේට වඩා හොඳ, ඉහළ ජීවිතයක් මාව මුණගැහුණ නිසා ඔයාට ලැබුණ බවත්.
 
ඔයාගේ අලුත් ලෝකෙට හුරු වෙනකල් ඔයාට ටිකක් අමාරු දවස් කීපයකට මූණ දෙන්න වෙයි. කෙනෙක්ගේ ආරක්ෂිත කලාපයෙන් එකපාරටම එළියට විසි වෙනවා කියන එක එච්චරම ලේසි දෙයක් නෙවෙයිනේ. ඒත් මං හිතනවා ඒ හැම දෙයක්ම මැද ඔයාගෙ හිතට ලොකු ප්‍රාණවත් බවක් දැනෙයි කියලා. එදා මුහුදෙ කිමිදිලා උඩ ආපු වෙලාවේ ඔයාගේ මූණෙ තිබ්බ සතුට මට හැමදේම කිව්වා; ඔයාගේ හිත ඇතුලේ ලොකු ගින්නක් තියෙනවා ක්ලාර්ක්. බය නැති කමක්; අලුත් දේවල් හොයාගෙන යන්න, අත්විඳින්න තියෙන ඇම්මක්. ඒත් ඔයා මෙච්චරකල් ඉඳලා තියෙන්නේ අනිත් හුඟක් දෙනා වගේ ඒ ගින්න යටපත් කරගෙන.
 
මං කියන්නෙ නෑ ඔයාට උස ගොඩනැගිලි වලින් බිමට පනින්නවත්, තල්මස්සු එක්ක පීනන්නවත් කියලා (හැබැයි එහෙම කරනවා කියලා හිතන්න මං හිත යටින් කැමති වෙයි සමහරවිට). ඒත් ජීවිතේ ගැන, ලෝකෙ ගැන බය නොවී ජීවත් වෙන්න. ජීවිතේට එක තැන නතර වෙලා පල් වෙන්න දෙන්න එපා, ඇදගෙන යන්න. ඔයාගෙ අර මී මැසි කලිසම අඳින්න ලැජ්ජ වෙන්න එපා, ඒක ආඩම්බරෙන් අඳින්න. ඒ එක්කම, ඔයා මොකෙක් හරි විගඩංකාරයෙක් එක්ක එකලාසයක් වෙන්න එහෙම හිතාගෙන ඉන්නවානං, මතක ඇතුව මෙයින් කොටසක් පස්සෙ කාලෙක ගන්න කොහෙ හරි අරන් තියලා තියන්න. කවදාහරි ප්‍රයෝජනේට ගන්න පුළුවන් ඉතුරුවක් තියාගන්න එක හිතට සහනයක්. ඒ දේට මගෙනුත් සම්මාදමක් ලැබුණා කියලා දැනෙන එක මටත් සහනයක්.
 
අන්තිමට මේ ටිකත් කියන්න ඕනේ. ඔයා මගේ හදවතේ සලකුණු වෙලා ඉන්නෙ ක්ලාර්ක්. ඔයාගෙ විකාර ඇඳුම් එක්ක, කමකට නැති මෝඩ විහිළු කතා එක්ක, ඔයාට දැනෙන කිසිම දෙයක් හංගගෙන ඉන්න බැරි ඔයාගේ අව්‍යාජකමත් එක්ක ඔයා මං ඉස්සරහට ඇවිදගෙන ආපු ඒ මුල්ම දවසේ ඉඳන් ඔයා මගෙ හදවතේ හිටියා. මේ සල්ලි වලට ඔයාගේ ජීවිතේ වෙනස් කරන්න පුළුවන් ප්‍රමාණෙට වඩා ලොකු ප්‍රමාණෙකින් ඔයා මගේ ජීවිතේ වෙනස් කළා.

මං ගැන වැඩිය හිතන්න එපා. ඔයා කඳුළු පෙරාගෙන මූණ බෙරි කරගෙන ඉන්න හැටි හිතන්න මට ඕනෙ නෑ. හොඳින් ජීවත් වෙන්න, එච්චරයි.

ජීවිතේ විඳින්න.

ආදර, 
විල්


~~~
Translated from 'Me Before You' by Jojo Moyes