01. ජීවන ගීතය...

සදා සොඳුරු වන අරණෙක

සැරිසරනා රණ මයුරෙනි

නිල් දිය පිරි සියපත් විල

පිහිනා යන රණ තිසරුනි

සවන් යොමා අසනු මැනැවි

මා කියනා මේ ගීතය

ඔහුගේ නාමෙන් ගැයෙනා

මාගේ ජීවන ගීතය

උදා හිරු කිරණ විලසින

දිනය එකළු කරවාලන

සිත පුබුදා සිනා සලන

මා දිවියේ හිරු නිරිඳුය

සිත්තම් ඵලකයෙ විසිතුරු

නන් පැහැ වන් දෝතට ගෙන

මා දිවි සිතුවමට නගන

මාගේ සිත්තරා ඔහුය

ගී ගයනා කොවුලන් හඬ

පරදාලන මිහිරි ගීත

ගයනා ඔහු මා දිවියේ

මියුරු මියැසියයි නිබඳව

අමයුරු රස වදන් දොඩා

මා මුව'ගට සිනහ ගෙනෙන

මගෙ ආදර මිතුරාණන්

ඔහුමය සැමදා නිසැකව

සිත තැවුලින් කඳුළු නැගී

මා හඬනා කළ සනහන

මහමේරුව විලස මගේ

අසලම ඉන්නේ ඔහුමය

දිවි ගමනේ ගල් පර දැක

නොසැලෙන නැවියෙකු විලසින

සැඩ සුලඟට බිය නොවනා

වනස්පතිය මෙනි ඔහු මට

මහ සයුරේ රැළි අතරේ

මංමුළාව තැවෙනා කළ

පහන් තරුව වී මා සිත

සනසාලන්නේ ඔහුමය

රෑ අඳුරේ මිහිරියාව

සඳ කැල්මෙන් නහවාලන

මා සිත සුවපත් කරවන

මා දිවියේ සඳ කුමරුය